Ahoi!

Ig bi dr Badour und heissä di härzlech willkommä uf mire Websitä.

D bärner Troubadourä hei mini Chindheit prägt, di lokali Rapszenä mini Jugend. Irgendwenn hani säuber afa Textä verfassä und Gitarrä spilä, dr Räscht het sech när irgendwie ergäh. D Kombination us simplä Akkörd und usgfieltä Textä isch mit dr Zyt zu mim Markäzeichä wordä. I minä Lieder fingä sech viu Alltagssituationä, Wortspilereiä und Humor wider. Im Zentrum vo au minä Textä steit stets d Liebi zur Sprach. Mi fasziniert’s, dass nur mit Stimm und emne einzigä Instrumänt Grosses cha usglöst wärdä.

Mini Musig isch und blybt es Niischäprodukt und bewegt sech irgendwo zwüsche klassischä Mundartchansons und bärner Rap. Ändi Früehlig 2022 hani denn ändlech mis Debütalbum «Hallo Alltag» veröffentlecht, es steit dir jederzyt gratis zur Verfüegig. Nach däm Release het me ufgrund vo minä Reiseplän lang nümme vo mir ghört. Mittlerwilä bini aber zrügg und i ha huerä Bock uf Nöis. Es stöh mehreri Projekt i de Startlöcher, me darf aso gspannt sii was ir nächste Zyt so louft…

Übrigens git’s eifach mini Websitä und paar Kanäl wome mini Musig fingt, soziali Mediä simer uf guet vätterlechs Bärndütsch schnurz. Es würd mi dahär sehr fröiä, we regumässig uf mirä Websitä landisch – dört fingsch näb mirä Musig o di nöistä Infos zu mir und natürlech d Datä zu minä nächste Gigs. Es fröit mi sehr, we du mini Musig losisch oder mau anes Konzärt vo mir chunnsch. Wenn o du Fröid a mim Züüg hesch, de het sech dr Ufwand no grad einisch chli meh glohnt.

Ganz viu Liebi geit usä a d Sprach, Musig und natürlech di

Badour

Video «Sessions im Advent» mitem Kollektiv Kellerklang: Da’sch dä Läbä feat. Tobi & Störä (2017)