Musig und d Aare hei di ungwöhnlechi Hitz i däm Summer meh als erträglech gmacht. Nach würklech tolle Konzärt in Wichtrach, Kofmehl und im Liebefeld Park si ändlech wider mal zwöi Festivals agstande: Ds Than Rock und ds Openair Solothurn. Abgrundet worde si d Summermonate dür wunderschöni Konzärt in Frutige und Bümpliz. Im Herbscht geit’s grad i däm Takt witer: Mundartbörse am Egelsee, Könizfescht ir Heitere Fahne, Kulturnacht z Burgdorf und Kulturbühni ir Marktgass. Ig fröie mi sehr, dört ds einte oder angere bekannte Gsicht dörfe z gseh!

Näb dene Gigs han ig i däm Summer mit mim Liedermacherkolleg Boris Bittel amne Projekt dörfe zäme schaffe. Chlyne Wärbeblock a dere Stell: Der Boris macht geile Shit, e Bsuech uf sire Website lohnt sech definitiv. Jedefalls hei mir zäme es churzes Lied inkl. Video ar Aare gmacht. Wär d Ouge offe bhautet, wird das Produkt uf de soziale Medie chönne bestuune (und das obwohl i mir tröi blybe und witerhin ke Social Media Kanäl tue betribe). Übrigens chönnt’s sy, dass das nid ds letschte Projekt chönnt gsi sy. Mir si grad ganz gross am Dänke, mal luege inwiefärn das de o umsetzbar wird sy. Aber meh zu däm es angers Mal…