HIE ISCH ES!

Mit vil Stolz ir Bruscht chan i itz ändlech mitteile, dass mys lang akündete Debütalbum «Hallo Alltag» hüt isch use cho. Du fingsch ds Album uf mire Website zum Lose und Abelade. Uf angere Plattforme (YouTube, Spotify usw.) fingsch no nüt, i bi aber dran das i de nächschte Täg no für di yzrichte. Ds Album isch gratis, aso zieh’s dir ine!

A dere Stell tuen i mi hie härzlech bi allne Beteiligte bedanke:
– Merci Välu fürs Ufnäh und Mixe, du hesch e grandiosi Büez abgliferet!
– Merci Oli fürs Mastering, du hesch ds Album gd nomau es Level ufeglüpft!
– Merci Störä aka Myco Molassi für di geniale Beats, du hesch d Stimmig huere guet ygfange und wyterentwicklet!
– Merci Aline, Andrea, Patzi, Mira, Alain, Fixu und Yännu für öie Ysatz im Studio, schön isch e Teil vo mim Fründeskreis ufem Album verträtte!
– Merci Giele vom Radio Gäub-Schwarz, dass ig öich und somit o äs Stück YB ha dörfe ufs Album druf packe!
– Merci Adi für ds Logo, dank dir het’s iz no e Portion «Anthem and Arrows»-Flair ufem Albumcover!
– Merci Yännu, dass mini Website füre Albumrelease zum 100. Mau hesch überarbeitet!
– Merci a mi säuber – i bi überzügt, dass ig mini Fröide, Zyt, Energie und mis hert agsparte Gält hie i z Richtige ha investiert!

Und iz wünschi dir viu Vergnüege bim Lose!