Letscht Wuche hei während füüf Tage d ChansonTage Bern stattgfunde.
I däm Rahme bin i am Donnsti zäme mit dr Misurina, em Raphael Nyffenegger und em Bobby The Kid am Songwriter Slam aträtte. Ig persönlech ha vil Fröid gha und e rise Erfolg dörfe verbueche, indäm dr Slam zu mine Gunste usgfaue isch – und ha ä Fläsche Wy gwunne, ou yeah!

D Berner Zeitung BZ isch a däm Abä o vor Ort gsi und het e Artiku zum Alass verfasst, wo me sech sehr gärn unter däm Link nomau darf ine zieh.

Um däm Ganze aber no d Chrone ufz’setze, isch mir drufabe d Ehr erteilt worde, am Fritiaabe im Theater am Käfigturm vor Noti Wümié es churzes Set dörfe z spile. Dr Aabe isch ungloublech toll gsi und wird mir in beschter Erinnerig blybe.

A dere Stell möcht i mi härzlech bi allne KonzärtbsuecherInne, KünstlerInne und VerastalterInne für di grandiose Chansontage bedanke. Merci vil Mal, es isch dr Wahnsinn gsi!