Ig ha’s tatsächlech gschafft usserhaub vom Kanton Bärn z spile – und das grad zwöi mau im wunderschöne Brugg:

Am 7. Juni hani im Odeon dörfe are wytere offene Bühni spile. Bsungers gfröit het mi dört, dass mi d Jury ufe dritt Platz gwählt het. Vom ganze Alass git’s übrigens vo Kanal K none Radiobytrag: Dä wird am Samsti, 6. Juli am 18:00 im Format «Null Kultur» usgstrahlt. Viu Spass bim inelose.

Dr zwöit Usflug nach Brugg het mi gester is Piccadilly verschlage, wo dr dritt Teil vom 20-jährige Jubiläum vom Troubadix Festival stattgfunde het (Bild). Dört han i zwöi nöii Lieder dörfe spile – und dank dene hani mi chönne fürs nächstjährige Liedermacherfest qualifiziere. Wäg däm chasch dir iz scho mau vormerke: A Pfingste 2020 fingsch mi z Brugg uf dr Bühni vom Troubadix. I fröie mi scho iz!