Mys zwöite Album «Ornig mues sy» isch geschter touft worde und isch der Wält frei zuegänglech. My nöi Schybe hout wi aakündet i d Cherbe vo de altehrwürdige und de nöizytleche Troubadoure vo Bärn. Ds Album het 11 Lieder und isch uf myre Website u allne gängige Plattforme z ghöre. I wünsche öich allne ganz viu Vergnüege bim Lose! Gärn tue i a dere Stell churz säge, wär aus beteiligt isch gsi und wäm i danke:
Der wichtigst Maa isch der wunderbar Henri Saarelainen, er het ds Recording u der Mix gmacht – merci dir vil Mau für di tolli Zämearbeit und das grandiose Ändprodukt. Beste Grüsse gehen raus nach Deutschland an Chris von Rautenkranz, du hast mit deinem Mastering das Maximum aus unseren Aufnahmen rausgeholt. Es wyters Merci geit a Fredi Frutschi, wo sech bi de relevante Stelle als Lektor mym Bärndütsch het gwidmet. Ds Albumcover het der Aaron Amport gmacht – tuusig Dank, i bi extrem zfride dermit. Im Hingergrund isch der Yannick Gafner wyterhin dr Maa wo mir bir Website unterstützt, danke vil Mau. Wytere Support han i vom Mundart Netzwerk übercho, sig’s bezüglech Plattetoufi, Radiouftritte, Gigs und Ustuusch – auerhärzlechste Dank. Merci Mike Baader für di gmeinsami Plattetoufi, ig wirde de Aabe so schnäll nid vergässe. Der letscht Dank geit a mi Hörerschaft a de Konzärt und über d Chopfhörer, dir syt di Beschte!