Voller Dankbarkeit lueg i zrügg ufs alte Jahr: Die Müglechkeit, es nöis Album dörfe z ufnäh, mit vilne tolle Lüt z toufe und so vili positivi Rückmäldige z becho, macht mi eifach nur glücklech. Merci öich allne!
Mis nöie Album «Ornig mues sy» het übrigens si Ursprung nid, wie me vilech dänkt irgendwo imne Egge ir bärner Altstadt, sondern in Galle (Sri Lanka). O wenn i mi bim Reise nid uf Musig tue konzentriere, entstöh trotzdäm geng wider nöii Idee und sogar ganzi Lieder. Vo mire lengere Uszyt in Südoscht- und Südasie sowie mire Reis dür Sulawesi git’s no einigi unveröffentlechti Lieder wo’s us konzeptionelle Gründ nid ufs letschte Album gschafft hei. Was söu drus wärde? Grad nomau es Album? Mau e chlyni EP? Es isch alles offe, d Zyt wird’s hoffentlech irgendwenn zeige…