Ahoi Fründe!

Ja, du hesch richtig gläse. I gönne mir e lengeri Uszyt und gah mau chli ga d Wäut entdecke. Das bedütet aber haut o zwungenermasse, dass i mini Musig bis uf Witteres mues uf Ys lege. Zwar hätt i uhuere Bock wyter z Bärn z blybe und flissig Musig z mache, aber dr Tapetewächsel gluschtet mi no grad um einiges meh. Wäg däm pack’i mi Rucksack und reise quer dür Süd- und Südostasie. Wie lang i wäg wirde sy, weiss i no nid – i würd mau schetze: öppe es Jahr, aber äuä sogar no chli lenger. Uf das Abentür fröi i mi sehr!

So wie ig mi kenne, wird’i mi vou und ganz ufs Reise konzentriere. Das bedütet, dass i ganz bewusst mini Gitarre dehei lah und mi wenig gar nid um d Website oder Mails kümmere. Aber zu dim grosse Glück hani’s vor mire Reis ja no gschafft mis Debutalbum z veröffentleche, de hesch du itz immerhin d Müglechkeit mini Musig i mire Abwäseheit z lose und d Texte uswändig z lehre. Und fröi di druf, wenn i wider zrügg chume: I ha da no dr eint oder anger Song wo müesst ufgnoh wärde und e uhuere gueti Idee fürnes nöis (physischs) Release. Wyter hani angers Bock dört azchnüpfe woni iz ufghört ha und ir Schwiz no chli uf Tour z gah oder bim einte oder angere nöie Projektli mitzmache.

Aso häbet’s guet und lueget zu öich. I bi itz mau wäg, me gseht sech äuä irgendwenn nächscht Jahr 😀

öie Badour